فيكى شيء بيشدنى

فيكى شيء بيشدنى

ياللى سرقتى النوم من عينى

كان النهاردة بين شفايفك

احلى كلمة سمعتها

كان النهاردة بين ايديكى

احلى لمسة بحسها

تعرفي وانا بين ايديكى

احساسي كان بيقولى ايه

بيقول لقلبي سيب دنيا فانية

وخليك لحب تعيش عليه

بيقول لعقلى اياك تفكر

الا فى حنانه ولمسة ايديه

بيقول لايدي اياكى تنسي

احساس جميل طول عمرى ليه

استحملى (اشرف توفيق )

.استحمِلي
..جايْ لِك مع الفجر اللي راجِعْ مهما موج بحرِك عِلِي
..لا يهمّني.. بُعد السَفَر
..ولا حتى سُورِك والغَفَر
..ولا خندق اليأس اللي بإْيدِيكي اتحفَر
..هَانْدَهْ واقول لِك: يا حبيبتي
..أسمع غُناكي وتنزلي
..استحمِلي
..فاضِل مَفِيش
..وعشان نعيش
..لازم يصبّرنا الأمل
..وماتسأليش إيه اللي ممكن يتعمل
!!دا البدر عايش في السما بْيصبُر لحدّ ما يكتمَل
الحلم قرَّب.. قرَّبي
مدِّي إيديكي وْجرَّبي
..وماتِيْئَسِيشْ مِ الحبّ.. لمّا بيتولد ويعيش عفيف
..واطَّمِّني.. أنا مش ضعيف
..ومانيش جبان
..لكن بابان طيِّب قوي
..وباحبّ اكون ابسط من الناس كلها
..لكنْ فى نفسى باكون قَوِى
لا الدنيا تكسر قلبي يوم
..ولا حدّ فيها يهزِّني
..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني
..استحمِلي
..أنا وانتي ورده فْ أحلى جنّه عبيرها واصِل للسَما
..لو يوم قَسَمْتِى الورده... لازم كل نصّ هيترمَى
..دا انا قلبي فوق كفِّك نَمَا
زهَّر.. وكل زهوره قاعدالِك تغنِّي
ازَّاي تعيشي فْ لحظه وانتي بعيده عنِّي؟
..طبْ جرَّبي
..انسيني يوم
..وقولي لي بس ازَّاي هتنسي وهتعيشيه
ازَّاي يعيش قلبك ثواني ماكُونش فيه؟
ازَّاي تقومي الصبح مابْقَاشْ حلم عايش بتشوفِيه؟
..ازَّاي عينيكي تشوف بشر
!مايكونش وشِّي فْ أيّ واحد تلمَحُه؟
أنا ننّ عينك.. يبقى بسّ ازَّاي عيونك يجرحُوا؟
ازَّاي تغنِّي وتلعبي
وف قلبي عُودِك.. ملعبك؟
ازَّاي تذاكري.. ماتنحتيش إسمي فْ قلوب على مكتبِك؟
ازَّاي هتمشي ماتحلميش
إنك تقابليني في أقربْ مُنحنَى؟
ازَّاي تنامي وْتحلمِي بْفارس يجيلِك عَ الحصان
َ!وماكُونش انا؟
وان يوم قِدِرتي على الفراق.. هتكمِّلي؟
..استحمِلي
..دمعِك كِتِر
..حتى امّا اشوف ضحكِك.. بتنزل دمعه تايهه بتعتذِر
..دمعِك طريقي للكسَل
دا انا لما اشوف دمعه فْ عيونِك
..نسْج قلبي بيتنَسَل
..وبيتغسَل
!!من دمع عينِك... والخجَل
..ضحكه فْ عيونك... أبتدي بيها اللي جيّ
..بسمة شفايفِك... قلبي يفضَل بيها حيّ
..خليكي جنبي.. نخلِّي كلّ الدنيا ضيّ
..واستحمِلِي
لكِنْ
..يا نبْض النبْض فيَّه.. وْحِلم عمري وْفرحتُه
..لو يوم رماكِي اليأس في إْيدين الملَل
..ونَدَه خلاص قلبِك عليكي بْدون أمَل
..هاتي الرسايل.. والهدايا.. والصوَر
..بصّي بْخيالِك عَ اللي فات.. والذكريات
..افتِكْري ضحكةْ قلبنا فْ يوم اللُّقا
..افتِكري دمعة قلبنا فْ يوم الشّقَا
..افتِكري كلّ شريط حياتنا وحبِّنا
!!وانسِيه بقَى
..انسِي حبيب ضيَّعْتِي قلبه بْدون سبَبْ
..كان كلّ ذنبُه
..إنُّه قال لِك لمّا شافْ قلبِك تِعِبْ
..استحمِلي"
..جاي لِك معَ الفجر اللي راجِعْ
... "مهما مُوج بحرِك عِلِي

(معاكى القلب يتحرر)

معاكى القلب يتحرر

وشمس الدنيا بتنور

حروف اسمك على الرملة ما تتغير

معاكى بحس بالفرحة

رموشك بالحنان طارحة

عيونك بحر وخدودك

تخلى لعشقنا فرحة

شفايفك شهد مشتاقلى

وشعرك موجى يندهلى

ولمسة ايدك الحلوة تغرقنى

تعرفنى ان انا بشتاقلك

وبجري عليكى واندهلك

ومن نظرة الاقى بحور الدنيا دى شكلك

يا حبيبتى

ياللى شفت الشوق فى بحور حنانك

لما شفتك قلبي سلم

ياللى كان الحزن جارك

عارفة معنى الحب عندى

وان اصل الحب دارك

وان الحزن نهايته جاية

مهما كان الهم زادك

وان جبال الحب ظاهرة

للى يوم يدخل مدارك

يا حبيبتى

ياللى من شكل الملايكة عرفنا صورتك

ياللى رقة الطيور معناها وصفك

ياللى لون البحر عينك

ياللى لون الرملة شعرك

انتى رقة الدنيا وحنانها

لما يكون وياها رسمك

انتى روحى وليا وحدى

ايوة عشقى ومنايا حبك

انتى جنة مليانة زينة

ياللى كنتى ايه لربك

عارفة ان الحب صورة

وان اصل الحب قلبك

عارفة ان جناين الدنيا

ماتسوى نظرة منك

وان حرير الدنيا يخجل

لو في يوم طال لمسة منك

وان شمس الدنيا تطفى

لو تحس بنور عيونك

ايوة نورك يسقى الكل

حب بلون خدودك

طيور الدنيا من نورك عيونها تطوف

تدور على اللى حنانها بيروى الوف

عصافيرك بشوقها الصافي

خلت حبنا مكشوف

وكل الناس حنان لكن

حنانك انتى يسوى الوف

عشقتك حتى من قبل العيون ما تشوف

انا وياكى مش خايف يا بلسم شوق

يا نبض القلب ويا الروح

عشان حسيت باحلامك

بتفكيرك فى ايامك

لقيتنى بشوف فى احلامك

جبال الخوف بتتكسر

دموعك مسكها عنبر

ومستنيكى مهما الشوق هيتأخر

عشان حبي مالوش اخر

ونبض القلب بيحاول

يكون جنبك ما يتأخر

بحبك حب مش عادى

حنانى ليكى بينادى

يا عشقى روحى علشانك

بحبك وحبي احلامك

وبعشق حالى مع حالك

وبتألم لو بعيد عنك

اصل انا عاشق طعم الحب فى قربك

جنة حبي هتفضل دايما عايشة لحبك

عارفة انا حبي حدودة فين

وسط جبال الشوق فى عيونك

وسط الجنة اللى فى نظراتك

اللى تملى شايلة حياتك

عشقتك عشق مش عادى

يغيب ويتوه فى لمحاتك

عشان وياكى بتهنى

وروحى تدوب ما تستنى

عيونى بيكى تتملى

تخبي صورتك الحلوة وتتغمض

وتحفر اسمك فى القلب وما تتردد

عشان حبي بيتجدد

وهفضل احبك مهما العمر يتمدد

يدوب سنة

كانت حياتنا ويا بعض يدوب سنة

بس كان ماليها كل الفرح والهنا

عمرى ما كنت فى يوم زعلان ولا حزين

واحزن ليه وحبيبتى معايا وجوا العين

ايوة حبيبتى فى قلبي شايلها

مهما يا قلبي تعدى سنين

مهما تسافر ولا تهاجر

بردة شايلها فى نن العين

بس حبيبتى دى ليا لوحدى

ولا فى قلبها شايلة اتنين

شايلة الماضي وخايفة

يكون الحاضر زيه حزين

خايفة تقرب منى فى يوم

عايشة حياتها بقلب حزين

عايشة بحزن بيقتل قلب اتنين عاشقين

عايشة بحزن بيقتل قلوب كل العاشقين