فتحت صندوق ذكرياتى
لقيت ورق ومعاه صور
دورت فيه على حياتى
لقيت حياتى قصيرة
وفتحت ورقة لقيت جروح
بصيت فى صورة ياقلبى ماتت من سنين
لقيت الم صحى ونادانى الحنين
وسرحت فى الصندوق بدور فيه
على ايه ؟ على لحظة فرح كانت معايا
كانت معايا فى البداية
كانت معايا من البداية للنهاية
وقبل النهاية لقيتها
لقيتها بعد سنين حزينة
لقيتها جنبى سنين طويلة
وانا اللى على عينى الغشاوة
مش شايف ، مش عارف
كانت فى بعدى سعيدة ولا حزينة
بس السعيد بيبان عليه
بتظهر فرحته فى عنيه
بيفرح كل البشر حواليه
ولما لقيت الناس جنبى بيشتكوا
بصيت لواحد بصيت كتير
لحد ما عينى دمعت
بصيت لغيره
لقيت وشوش الناس مراية
مسحتها بدموعى
لقيت قلوب الناس حزينة
والحزن فى وشوشهم ايه
بكيت على نفسى على طفولتى وصبايا
رفعت عينى للسما وناديت يا هادى
لحد امتى يعيش الحزن فى قلوبنا
لحد امتى تسيل دموعنا
لحد امتى هايعمينا ظلام الليل
وليلنا طال وبعد كل ليل نهار
نهار بتطلع شمسه فى السما منورة
نورها يملا قلوبنا فرح وهنا
لقيت شوية نور فى قلبى
وعرفت ان ليلنا طال
ومهما طال هاتفضل قلوبنا دايما فى انتظار
لان بعد الليل دايما ييجى النهار
لان بعد الليل دايما ييجى النهار
ليست هناك تعليقات:
إرسال تعليق
اتمنى المدونة تعجبكم وبرحب بتعليقاتكم