دعيتي ربنا عليا
يخلص حقك المهضوم
فقام طفي ف عيوني الضي
وخلاني بالعذاب مكلوم
وربي عدل بيخلص ذنوب
الخلق ويقدرلي في المحتوم
بنام الليل بعين واحده
وعين مسروق منها
النوم
وبستني العليم بيا يريحني
وينصر دعوة المظلوم
دعاكي لو في علم الغيب
بيسري بالعذاب واللوم
علي جفوني ، وخدينك
دموع من لهفة المحروم
ومين قالك ببات ظالم
ودمعي في العيون مسكون
دانا من يومها ما ارتاحتش
ولا كملت حلم في نوم
ولا حسيت في يوم راحة
ولا راحت عليا هموم
دي عارفة مكاني لو نايم
وفي سهادي ولما بقوم
وخليتني يا روح الشوق
بيتعد في نهاري نجوم
مانا مظلوم كمان زيك
وبلجأ للزمان باليوم
ولا لحظة انا نسيتك
ولا نفسي سامحت في يوم
ليست هناك تعليقات:
إرسال تعليق
اتمنى المدونة تعجبكم وبرحب بتعليقاتكم